Foto:
Columns

Holt nog eff'n vol

Dat astur toch dinge bent die weer komp, daorvan is disse Hendik ‘t bewies. Toe begin dit joar de corona dur flink inhakk’n, kreek een tillefeuntie van de krante dat Hendik stille eleg word’n. Vanwege alles rond corona, war’n deur veule minder advertenties en sus mos bezuunigd word’n. Deur Hendik stille te leng’n word’n veural onderstreept dat alle kleine betties help. En daorumme hei een goed half joar de kop van Hendik in disse krante mutt’n miss’n. Ma van de veurige wêêke kreeg ik een berichie van de krante dat Hendik weer an de slag kon. Dat zet oe dur dan ook ma zo bie stille bie wat tur sinds begin meert is gebeurd! “Heerde loopt te hoop tegen Lelystad’ was ‘t verhaal dat ik veur disse krante van 18 meert emak hadde. Ja, wie hadd’n al wel eheurt van corona ma De Heerdt leup toch nog mooi vol um in actie te komm’n teeg’n de vliegtuigen.

De daag\n daornao begunt ‘t en kwam\n de verhal’n lös. Die was ziek, en die lag in ‘t ziek’nhuis, die vergadering gunk niet deur en dat concert was of elas. En dat was nog mar ‘t begin. Alles word’n stil eleg, tut de viering van 75 joar bevrijding an toe. En wat is tur wat gebeurt in Heerde en Waop’nvelde. Zoveule verdriet dat aai ok nog hoaste niet konn’n del’n, zoveule angst op de kamer zonder visite. Al die dappere dokters, assistentes en verpleegsters die wêêk’n lank op de tiene moss’n lop’n. Op de Engelmanskamp en an de Kartelweg de iene rouwstoet nao de andere, de begrafenisondernemmers war’n wat minder in ‘t niejs ma die heb ok heel wat met emak. .

De zommer die volg’n wol nog wel, wie kond’n dur weer op uut al war’n dur beparking’n. Hendik en Jennegien bent in september nog een wêêke weg ewès noa ‘t land van Maas en Waal. Veule fiets’n, op terrasje met gepaste ofstand en vadder weinig drukte op ezoch. Ma wie war’n nog met zien beid’n en gezond en doar bei dan is weer biezunder dankbaar veur. Andere mens’n kreeg’n niet de kaans om hun verdriet te verwar’n, moss’n zoals burgemeester Jacqeline Koops hun wark neer leng’n. En noe zit wie al weer wêêk’n lank op dinsdagoamp te kiek’n wat Rutte en de Jong weer te vertell’n heb en welke maatregels ze weer ankundig woar aaw weer las van krieg.

Tenminste, zo wodt dat deur een hoop mens’n ervar’n: zie krieg oaveral las van. Hendik zol graag zien dat dat umme edreit word’n. Zie ‘t veural as wat aai doen kunt um dur veur te zurg’n dat ‘t zo snel meugelik weer goed giet. Spant oe in um besmetting’n te veurkomm’n, doet oe beste um te veurkomm’n dat mens’n weer op de tiene mutt’n lop’n en dur zelf an onder deur goat umdat ze veur een ander wilt zurg’n. Eerlik gezeg mis ik dat in onze saam’nleaving: dienstbaar wêên, of zoas Jezus leer’n: oe naaste lief te hebben as oezelf.

Dur bent heel veule veurbeeld’n die bewies dat dat wle gebeurt. Dat ziej an de veurdracht’n veur de Heerder Vriewilligerspries um wat te nuum’n. Ma met menare zoj zoveule meer kunn’n. Toch ma die middag thuus bliev’n in plaats van veur de lol goan sjopp’n, toch ma iets minder mopper’n achter de geraniums, iets meer op bezuuk goan as dat kan. Gewoon nog eff’n volholl’n zodat ‘t moment van bevrijding en herdenken wat sneller dichterbie kump.

Hendik uut de Veldsiet

Meer berichten

Het lokale nieuws in uw mailbox ontvangen?

Aanmelden