Oe naaste en op staon


Foto:
Columns

Oe naaste en op staon

Disse daag’n kwam’n bie mien de herinnerging’n bov’m an de ritt’n die aak vrogger met de busse nao Zwolle of zo mak’n. Meestal nao Zwolle want daor stunt de ambachtsschoele en met slech weer mog ik met de busse. Later wark’n ik bie de Philips en ook daor mos ie met de busse nao toe. Van de Zwolse buss’n is mie altijd de uutspraak ‘De busse van Schutte, rok’n en loop’n dat dutte’. De Veluwe op gung ie met de buss’n van de VAD. Ma as ‘t slech weer was, dat waar’n dur ok passagiers genog. Vaake genog koj de hele weg bliev’m ston, een bettien hang’n an zo’n lusse.

Veur in de busse hang’n een bordtien: ‘Niet praten met de bestuurder’ en vaake ok nog ‘Spreek vrijmoeidig over God maar misbruik Zijn naam niet’. In pakweg een zestig joar is tur toch wel veule veranderd. Noe ziet sommige mens’n dur gin bien in om een bestuurder al vluukend in menare te sloan. En dur was nog meer wat veural veur oons vente op gunk. Aai al is een plekkien hadden, koj uut goed fatsoen niet altijd bliev’m zitt’n. Want astur older’n war’n - en de mens’n waar’n toe met zestig joor al old - , dan heur’n ‘t zo dat aai op gung’n ston en netties zeeg’n: meneer, mevrouw gaot hier ma zitt’n. Ik heb nog jonge biene. Daor mak’n ie totaal gin punt van, dat heur’n zo.

Ma eerlik gezeg gunk niet iederiene eff’n vlot opston heur. Astur een oldere keerl binn’n stapp’n, keek ie nog wel is strak nao buut’n, daor leup een jonge meid bie de busse weg of zo. Dat de olde man wat hulpbehoev’nd of zielig oe kante op kee dat woj niet zien. Ma vaake was tur dan wel iemand die oe op de scholder tikk’n: Zo die meneer daor mag’n zitten? En nee, die man word’n niet in menare eslaag’n ma ie pakk’n braaf oe tasse en al dan niet met teeg’nzin gung ie ma weer an zon lusse hang’n. Mat ston of hang’n, ie kwaam’n wel in Waop’nvelde.

An zon ritte met de busse mut ik wel is denk’n in disse corona tied. Wie zitt’n met zien all’n in een rit met een propvolle coronabusse en das hadstikke vervelend. ‘t Is in de busse um te stikk’n, iederiene is hadtsikke nat ereeg’n, de roet’n bent beslag’n, ‘t tocht as een gek en stink’n dut ‘t ok nog. Ie weet’n dat aai dur nog niet bent, an de bushalte waor as de busse stopt weet ie hoe varre ‘t nog is veur aai uut kunt stapp’n.

Wat ‘t helemaol zwaor mak is dat de sfeer in de busse ver ander ‘t vriespunt is. Aai oe buurman per ongeluk op de tiene goat ston, kriej een elleboage tussen de ribb’n. En de mevrouw daor aai bie een scharpe boch teeg’n an veul’n, gif oe gelieke een klap met een paraplu. Zo zie ik tenminste tut mien stomme verbazing mens’n reager’n bie de corona rit die wie noe maak en die aaj met zien allen uut mutt’n zitt’n.

Noe de Kàsdaag’n en de vaccinaatsie dichterbie komp liek ‘t alleent ma arger te word’n. ‘t Liek wel of gin mense meer veur een ander op wil ston, iederiene hef recht op een zitplaatse en mut vriej uutzich hem en o wee as ‘t kuss’n van de stoel niet lakker zit! Misschien goed um is wat meer te lett’n op ‘t Kind van de Kàsdaag’n. Die had ‘t aover oe naaste is een beker kold water te geev’m of een warm kleed kado te doen. Misschien mut wie noe onze naaste een zitplaatse in de coronabusse gunn’n....

Hendik uut de Veldsiet

Meer berichten

Het lokale nieuws in uw mailbox ontvangen?

Aanmelden