Foto:
Columns

Een pauwe op Petrea

Is mien die Bennie Keizer altied druk um de wilde varkn’s van zien arf te holl’n op Petrea, hef zich ok ‘t vollende gevoar an edient. Noe gin viervoeterig wruutend dink aover de grond ma ‘t kump deur de luch: een pauwe van heb ik jou daor. Bennie is ok van de vriejwilligers bie de meule in Waop’nvelde en daor vertell’n hie onder een flessien - noa einde warktied - zien verhaal. ‘t Veult mien op dat noa mate ‘t peil in ‘t flessien dal’n, de pauwe steeds groter word’n. Toe ‘t flessie leug was, was de pauwe biena net zo groot as Bennie zelf. ; t Dier is van ‘t zelfde geslach as Bennie dus een mannegien. En ie weet’n die kan zo af en toe zien veer’n geweldig uutzett’n. Asse op de Meul’nweg die veer’n uut zol zett’n, dan kan dur gin auto meer langs, vertellen Bennie zonder een spier te vertrekk’n.

Bennie hef gin idee hoe die pauwe daor terechte ekomm’n is. Misschien aover ‘t draod in de weie egooit, misschien gewoon an komm’n loop’n. ‘t Schient dat Bertha de pauwe ok nog wol voer’n ma dat hef Bennie ten strengste verbeun. Dan kriew dat dink hier nooit weer weg Bertha, is Bennie van mening. Want die zit tur ma mee. Elke marg’n giet Bennie met de schoppe en de kruuwag’n rond. Want zon grote pauwe kan ok grote poll’n driet’n! ‘t Dier is smaans ok al vrog bie. Dan schreeuwte van ‘paaaauuuuuwwww’ deut Bennie veur. En eerlik is eerlik, ‘t klonk net ech. Aai Bennie is teeg’n komp muj hem ma is vroag’n offe een pauwe noa wil doen.

Ma Bennie zol dus graag zien dat de rechtmatige eigenaar van de pauwe zich meldt. Noe maak dat dink hum elke marg’n vrog wakker. Aai ‘m op haalt muj dat zelf doen. Bennie hef probeert wat dichter bie ‘t dier te komm’n. Ma dat deut metiene een uutval met zien scharpe snavel noa de hande van Bennie. Nou, is snap wel dat dat een geweldige snee ewès is. Die is trouwns snel geneez’n want hie kon een flessie bier en een stukkie wors tegelieke vaste holl’n! Ma, aai een pauwe mis, meldt oe dan op Petrea!

As alles goed giet, krig Hendik disse wêêke ok zien corona spuite, die van die muuilijke naame. Aai die een bettien verkeerd uutsprêêk dan hei oe kunstgebit veur de voete ling’n. Ma hoe dan ok, Hendik mut zich melld’n bie de Iesselhall’n in Zwolle en doar zal ‘t gebeur’n. Ik hoevm doar niet lange oaver noa te denk’n, ‘t liek mien ien van de weinige menier’n um corona dur onder te krieg’n. Dat is met veule ziekt’n gebeurd. Ik heb heel wat verhal’n eheurd van mens’n die te mak’n ehad heb met corona. Ik ben al hatstikke bliej dat Jennegien en ik nog gin problemem ehad heb.

En aai noe met kunt wark’n um vaddete narigheid te veurkomm’n, dat doe ik doar met alle liefde an met. Ietsie meer an een ander denk’n liek mien zo verkeerd nog niet. Hendik was de ofgeloopn tied wel verbaast hoe veule mens’n prbeert um zien mening te verkondig’n, ‘t beeter te weet’n dan deskundig’n en oaveral wat op an te màrk’n, doar woj niet goed van. Wie heb soms de tillevisie wel is uut edon bie al dat geneuzel. Ik hoope dat veural de kinder en kleinkinder weer gauw de gank kunt goan en Hendik wil zich dan nog wel een poossien rustig holl’n. Dur bent tied’n dat aai eers an een ander mutt’n denk’n en dan pas an oezelf.

hendik uut de veltsiet

Meer berichten