Foto: Veluws Nieuws
Columns

Column - Inez had gin stadse fratsen

Disse wêêke nemp Inez Pijnenburg ofscheid as burgemeister van Heerde. Bienoa tien jaor geleen kreeg zie de ketting van Heerde umme. Daor war'n nogal wat bedenking'n. Veur 't eerst een vrouwe, ok nog een VVD-er en gebor'n in Brabant! Dat zol wel veule gedoe gaon geev'm. Ma niks van dat alles. Inez ler'n bie Herman Visser al gauw alles aover 'Uulle, wuulle en zuulle' en gunk op 't Hoornervêêne won'n. Ja, niet in de spoorwagon van Andries Buut'nkamp, daor kwamp wat anders veur in de plek. Zie ler'n ok 't Heerder volkslied. Jan van Riemsdiek hef 't tur aover dat in Heerde gin plek is veur stadse deftigheid. Nou, daor hoev'm wie oons in 't geval van Inez Pijnenburg niet druk aover te mak'n. Deftigheid is heur vremp, zie was al snel de burgermoeder veur iederiene. Een veurdeel was ok dat ze de weg wis bie de provincie in Arnhem. Dur is een hoop geld disse kante op ekomm'n en dat had nog mooi mee kunn'n wêên. Ok veur 't transferium bie 't Heerderstrand en veur een stuk of wat nieje brugg'n lag tur geld klaor. Veur wat heurt wat vindt de provincie dan ma daor denk oonze raod soms anders aover en dat heet politiek. Ma wat tur ok veur sturms ewes bent in 't gemeentehuus, Inez bleef Inez hèk 't idee. Al was dat onder wat ze 't vierde college nuump wel wat muuilijker. 't Siert heur dat ze al weer veuruut kik, en weer vadder wil. Wat huize Pijn'nburg ok siert, is de bronzen padde en misschien kump daor disse wêêke nog wel 't ien en ander bied. Donderdag wodt Inez uut ezwaaid en dat zal wel een hoop drukte geev'm in de Heerd. Ma 't van Meurspark is groot dus een lange file veur de deure is gin probleem.

Disse wêêke is 't fees bie de brandweer in Waop'nvelde. Al 75 jaor heb wie een eig'n brandweer. Jan van Riemsdiek hef daor ok een vassie aover emak: 'Ramplamplam, daor kump de brandweer an'. Hier hef 't in dat vassie oaver tien meter slange en zeuv'm meter gat. Ma die tied'n bent veranderd, zie heb noe machtig mooi materiaal. Daor zölt ok nog wel een hoop olde verhal'n op ehaald word'n. Hoe ze een keer deur de plietsie weer noa de kazerne ebrach bent nao een schoorstienbrand in een grote villa. 't Naobluss'n namp daor veule tied in beslag..... En de keer dat ze in een nieje brandweerwag'n een beste deuk red'n. Die zol de volg'nde dag offisjeel aover edragen word'n! Abjan Visser en de olde de Reuver heb zo'n bettien de hele nach deur ewark um die duk weer weg te poets'n. Of aover de oefening die Aart Zwerus uut eschreev'm had bie hum zelf thuus. Achter de Hubo hatte wat olde rommel in brand esteuk'n, daor mosse vanof. Elke brandweer man is immers ok een pyromaan en Aart zol wel eff'n een vuurtien mak'n waor as de jong'ns op oef'n konn'n. Aart had een tied of espreuk'n dat de jong'ns komm'n zoll'n en had de boel al vaste an esteuk'n. Ma toe de wind tur goed onder kwamp, leek 't mis te goan. Aart vleug nao de tillefoon: "Waor blief uulle toch! 't Vuur giet veuls te had en Neeltje lup al rood an!". Zie roaz'n toe zoa had deur de Veldsiet heer dat de kipp'n een wêêke van de leg ewest bent en de geit'n drie dag'n gin melk meer gav'm. Ma de Hubo word'n ered en daor gunk 't umme. Ma zie heb ok wel heel andere dinge met emakt. Laote wie dur met zien ma mooi trots op wêên dat wie nog zon stellegie keerls heb die dat doen wilt. En dus heb ik gin probleem met noabluss'n!

Meer berichten