Logo veluws-nieuws.nl


Foto: Veluws Nieuws
Columns

De elektrische fietse

Hendik hef 't noe veur menare. Sinds veurige wêêke stiet tur een elektrische fietse in de schuure. Wat zeg ik: dur staot noe twee elektrische fiets'n, veur Jennegie ok iene. Aldergloep'ns wat een spul. Hendik wol dur nooit zo an. Ech trapp'n wos nog goed veur de beweging en zo. Dan bouw'n ie condietsie op. Niet dat Hendik noe zoveule op de fietse zat. Ik mut op mien meniere nog wel is wat met nemm'n en dan pak ie de auto. En ok an reeg'n hèk een hêêkel. En aangezien ut in dit land nog al is rêêgnt, zat ik dus gedurig in de auto. Ja, noa WZC dan gunk Hendik wel op de fietse. Dat veural vanwege de dadde helfte zo aai wel zolt begriep'n.

Ma een steugie trugge war'n Jennegien en ik op fekaansie in Oosterhout, mooi in 't Brabantse land. Normaal nemme wie dan altied de fiets'n met ma de weerluu proat'n aorig van rêêg'n en wind en dus hebbe wie de fiets'n ma bie huus eloat'n. Toe aaw daor war'n knapp'n 't weer aorig op. Ik zaage dat ze op dat bungalowpark waor aaw war'n ok fiets'n verhur'n, ok elektrische fiets'n.

"Zow dat ma is waog'n Jennegien? Dan kunne wie is kiek'n hoe dat is". Jennegien was 't gloep'ns met mien iens. Dat leek heur ok wel een goed idee. Zie had al is vaaker een ballegien op egooid um 't elektries te doen. En zo gebeur'n 't dat wie in 't Brabantse land kennis maak'n met de elektrische fietse. En keerl wat gunk dat mooi! Hendik drei'n op 't eerste de beste viaduct de ondersteuning in de hoogste stand en ik vleuge naor bov'm! Zonder een centje pijn. Niks gin gehijg toe aak bov'm waare, gin kramp in de kuut'n of wat dan ok. Jenniegie en ik war'n gelieke verkoch. Noa zo'n dattig kilometer waare wie weer thuus en heb gelieke de fiets'n ok mar veur de vollende dag vaste eleg. De voll'nde dag een rittien emak noa de Biesbos. Wel een keer of wat mutt'n zuuk'n noa de goeie knooppunt'n. Want dat hebbe wie ok metiene ma eleert: fiets'n langs knooppunt'n. Ik had mien een hele riej bingo-getall'n op een brieve eschreev'm en dat gunk helemaole goed. Mien hoogtepunt beleev'm ik in Oosterhout. Wie hadd'n boodschapp'n edon en hal'n een paar schoelkinder in. "Kijk die oudjes eens hard gaan", zee zo'n jonk en dat deut mien hatstikke goed!

Ie vuult 'm al ankomm'n: Jennegie en ik war'n kats verkoch. Op de trugweg waare wie in Heerde en ik zeege teg'n Jennegied: "Zolt wie drek ma deur rien nao Mark Slijkhuus? Dat is een vernemstig jonk en die zal oons vaste wel an zo'n vervoermiddel kunn'n help''. Dat gunk Jennegie wat te varre. Ma noe is 't tur toch van ekomm'n. Wie heb van Mark tekst en uutleg ehad en Jennegien mos ok proef zitt'n op een biezunder zadel. Noe bent de eerste ritties emak en 't giet merakel.

Wat mien ok opveult was dat aai oons niet heurt, die fiets'n bent hatstikke stille. En dat brach mien weer op een idee. Aaw noe ok is elektrische vliegtuig'n gung'n mak'n? Dan bei val al dat gedoe aover 't lawaai of. Dan blif 't mooi stille bov'm de Veluwe. Want dat oons wat te wach'n stiet is wel duudelik. Die Alderstoafel hef oons een hoop wies emak en ik mut nog zien dat 't goed kump. Ma een gezamenlijke motie van alle Veluwse gemeent'n en de provincie is misschien een oplossing. Ie maag oaver de Veluwe vlieg'n, as 't ma elektrisch is.

reageer als eerste
Meer berichten