Logo veluws-nieuws.nl


Foto: Veluws Nieuws
Columns

Niet meer van disse tied

Um de haverklap kuj de opmàrking heur'n: Dat is niet meer van disse tied. De achturige wàrkdag is niet goed veur oe en veural niet veur de wàrkgever, dan roessie vaste in structur'n en patron'n. 't Ontgruu'n van student'n is ok niet meer van disse tied net as een verbod op de koopzundag, veertig joor wàrk'n bie dezelde baas, noa de kàrke goan en de zomertied. 't Is ien van de argste doodzund'n in disse tied aai niet meer van disse tied bent. 'Bei soms veur de oorlog van huus egoan?", heur ie dan wel is.

't Deut bie Hendik de vroage opkomm'n: Wat is dan nog wel van disse tied? Volg'ns mens'n die dur veule meer van wet'n as Hendik, mut in disse tied 't leav'm veural leuk wêên. En dan ok nog: alles mut leuk wêên. Dat is vaake ok nog niet genog: 't mut allemoale fantastisch leuk wêên. Nemp noe gewoon 't weekend. Dur bent veule mens'n die oe meewarig an kiek aai op de vroage "Heb je een leuk weekend gehad?' as antwoord geef: "Gewoon lákker rustig thuus ewes". Nee, in disse tied mut oe uutstappie een 'geweldige beleving' ewes wêên en bestuurders bent naant anders dan op 'energiegevende en inspirerende bijeenkomsten' waor ze 'enorm' van heb genoten. Alles mut stoer, stàrk en leuk wêên, En dat 't liefst in de oavertreff'nde trap. En as dat zo is, dan mut dat ok met iederiene edeelt word'n via de sociale media.

Ie komp zat dinge teeg'n die wel van disse tied bent. De 500 riekste mens'n op disse weerld bent weer een biljoen dollar rieker eword'n. En dan zal nog wel deur goan want 't ofschaff'n van dividendbelasting van 1,4 miljard euro zal hun vaste wel weer help'n. Bezuunig'n op de zorg en stelselmatig opvoer'n van de warkdruk is ok van disse tied. Ma ok de leerkracht'n in 't basisonderwies onderbetal'n is bliekbaar van disse tied net as 't hooge op een peerd zett'n en de rode loper uutleng'n veur ontwikkelaars op allerlie gebied. En 't aantal kinder dat in armoede opgruuit wodt in disse tied steeds ma hoger. Noe al meer dan 125.000 en volgens 't CBS kump dat neer op ien kind in elke klasse. Datzelfde CBS meldt dat de armoede in disse tied steeds hardnekkiger wodt. Noe al leaf tur 417.000 mens'n onder de armoedegrens. En ok van disse tied is dat de gemeent'n komp met een kindpakket um toch wat pleisters te plakken. En ja, ok van disse tied is de Voedselbanke, op ezet deur mens'n die met 'innerlijke barmhartigheid bewogen' bent zo as in 't Grote Boek stiet. Dan hèk 't nog niet aover vluchteling'n. Ja, op pepier hef Europa de boel wel eregeldt ma 't NRC meld'n kot veur Kàsdag'n dat 't kamp Moria op 't Griekse eiland Lesbos hatstikke vol zit met 8.000 mens'n. En de plietsie meldt dat astur in disse tied in ien joor 75.000 incident'n met verwarde mens'n ewes bent.

Ik kwaame daor op umdat aak zo rond de kasdaag'n wat mens'n teeg'n ekomm'n benne veur wie niet alles rozegeur en maneschijn was. Die tobb'n met hun leav'm, die nao een bezuuk an de kinder in een leug huus kwam'n waor ze zelf de lichknop an moss'n doen umdat alles donker was.

Wie stoat weer veur een niej joor. Dan zoj denk'n dat aaw alle tied krieg um de boel een bettien bêêter te goan verdel'n. Ie kunt vaste wel een banknummer vin'n um daor metiene mee te beginn'n. Een goed begin is 't halve wàrk.

reageer als eerste
Meer berichten


Shopbox