Logo veluws-nieuws.nl


Foto: Veluws Nieuws
Columns

Gait Luntie is uut de tied

Veurige wêêke kreege wie een rouwkaarte in de busse: Gerrit Wagenvoort of wel Gait Luntie is uut de tied. Hie is maondag in Waop'nvelde begrav'm. En daor word'n Hendik stille van. Want ik heb heel wat met emak met wat leek de vriejgevocht'n bakker. Zo ken ik hum vanaf de tied dat aak nog een jonge waare. Een paar keer per wèèke stopp'n de Volkswag'nbusse vol stoete bie oons in 't hofpad. Dan kwamp Gait de stoete dur an evleug'n. Zachies lop'n konne niet, 't gunk altied in gank en draf. Dat mos ok wel want op zien ronde met 't brood mos tur wel tied aover bliev'm veur andere dinge. Zoas eff'n streup'n met Japie Gas in 't Waop'nvelder Broek waor asse prachtig aover kon vertell'n.

Later ler'n ik Gait bèèter kenn'n. Aai wat organiser'n in Waop'nvelde, koi eig'nlijk niet um Gait de stoete heer. Hie was veurzitter van de muziekvereniging ONA en leider van de boer'nkapel de Vrolijke Boerties. Hie had een tomeloze energie as 't um de muziek gunk, daor hatte alles veur aover. Hie kon smakelijk vertell'n dat noa een aomp met de Boerties hee in de kleine uurtjes rechtstreeks nao de bakkerieje gunk en dan staonde eff'n de oog'n dichte deut. Tut zien va de bakkerieje in kwamp! Later namp hie met zien vrouwe Hennie de bakkerieje en de winkel an de Kanaaldiek aover. En wat wasse gek met dat Schuurmannegie! Met Gait koj ok van alles belèèv'm. Onderdeel van Waop'nvelde 150 joor, was een Boer'nbrulfte in 't Spyker. Een mooi fees, alleent bleef Beernd de Sander angescheut'n in de zaal zitt'n. Beernd was op de brommer en mos wel noa huus. Gait was toen al met vuurwárk begunn'n en had een knaloranje busse. Wie heb saamp Beernd veurin in de busse eheisterd, de brommer gunk achter in. Hendik namp plaatste op de brommer en heult hum vaste an de luss'n in de busse. Zo heb wie Beernd netties bie huus ekreeg'n. "Proat tur vadder ma niet aover Hendik, ie weet'n hoe de mens'n bent", gaf Gait nog mee.

En hoe de mens'n war'n, daor kwampe achter toe asse de zaake dichte deut en as ambtenaar bij de Raad van Arbeid in Zwolle gunk wárk'n. Dat pass'n totaal niet bie Gait. Ma 't water zal nao de zee en dus pakk'n Gait wat anders op: vuurwárk! As jonge handel'n hie al stiekum in dat spul. Deuk bie Looman an de Legestraote achter de héége toe de plietsie hum noa zat. Toe hie daor goed mee an de gank gunk, mos Hendik natuurlik wat verhal'n mak'n. Toe hek hum veur estelt um zien biename Gait de stoete ma te verander'n in Gait Luntie. En aldus gebeur'n. Gait eig'n vleuge daor vol energie in. Hie hef de basis eleg veur 't organiser'n van wat toch een vriegevoch'n wereld was. Hij trok ten strijde teg'n de hoogwatergeul, had veule contact met professor Bob Smalhout, heulp zo links en rechs mens'n en prober'n Trots op Nederland van de grond te krieg'n in Heerde. Dat was niet zon succes, Gait en de politiek, nee dat gunk ok niet saamp.

Toe word'n hie ziek Wat heffe evoch'n! Net as altied met tomeloze inzet. Ma ok kwamp 't besef datte zich aover mos geev'm, in die tied hek fijne gesprekk'n ehad. Zien rouwkaarte zee alles: ien voetspoor in 't zand want hie word'n toe 't heel muuilijk was, edraag'n deur zien Heiland. Hennie en de kinder: uulle heb de zurge ehad veur, ma veural ok van een groot man. Hendik zal 'm in ere holl'n.

Hendik uut de Veldsiet

Meer berichten

Shopbox