Logo veluws-nieuws.nl


Foto: Veluws Nieuws
Columns

Saamp noa de Eper mark?

Peter van Annie van Berend had vrogger een conference en daor zat ok een vassie in: 'Wie bent saamp noa de Eper mark ewès'. Dan kwamp tur ees iene name en begunt hie weer van veur'n of an en word'n dur ok op enuump wat ze daor ekof hadd'n.. Dan kwamp tur een tweede name en begunt hier weer van veur'n of an. Ie word'n iedere keer niejsgierig nao de voll'nde naame. Wie was tur nog meer met ewés nao de Eper mark en wat hadd'n ze daor edon?

Ik mosse an dat vassie denk'n toe aak heur'n dat de gedeputeerde Jan Markink binn'nkot nao Heerde kump um is proat'n aover saam'nwarking. Want an de Eper mark stiet ok 't gemeentehuus van Epe. En ie kunt ma zo op de klomp'n anvuul'n dat de previncie graag wil dat Hattem, Heerde en Epe drie hande op iene boek wodt. Dus eig'nlijk met menare nao de Eper mark. Jan Markink is een vernmestig keerltie. Daor kunt ze bie de skeelerclub van met proat'n want Jan heb daor een hoop zak'n eregeld en mede daordeur ligt ter wat moois aan Kommerseweg. Noe hef Jan Markink naos sport ok bestuurlijke sam'nwarking in zien tak'npakket en giet hie ok aover de provinciale portemonnee.

Jan Markink hech merakel an sam'nwarking en wat dat betref zalle alle steun krieg'n van burgemeister Fred de Graaf. Die was ooit al is veurzitter van de commissie Stark Bestuur. Ma zon commissie is wel mooi ma die kan meestal niet veule klaor krieg'n. Dat ligt bie Jan Markink anders. Die hef al is laot'n wet'n dat gemeent'n die niet wilt saamp wark'n dur ma op mutt'n rêêk'n dat dan minder uut de provinciale ruif krieg. An de andere kante: gemeent'n die wel wilt saamp wark'n wodt daor veur beloond. In 't geval van Heerde lilek 't mien dat ze wel wat beloning kunt gebruuk'n. Ik kan mien zo veurstell'n dat Jan Markink zo langs de neuze weg ok is informeert hoe 't zit met de drie miljoen die Heerde tekot kump. En dan hei wat uut te leng'n.

An de andere kante: ie mutt'n dur ok niet altied happig op wêên dat de provincie oe help'n wil. De keer dat dat gebeurt is rond 't industrieterrein H2O is dat niet zon succes eword'n. Noe weet ik wel dat dat plannegien emak is toe as de boom'n nog tut in de hemel zoll'n gruui'n. Ma toe dat plannegien niet zo goed uutpakk'n, bleef 't vanuut Arnhem doodstille. Zelfs in 't oaverleg met Oaveriessel heb ze niet 't onderste uut de kanne kunn'n hal'n. H2O mut wel rêêkening holl'n met wat tur aover de Iessel aan industrieterrein'n lig.

Ik kan mien zo veurstell'n dat in 't oaverleg met Jan Markink dat wel is een hiet hangiezer kan word'n. As de gedeputeerde gemeente'n wil belonen veur samenwarking, kanne met 't oploss'n van de preblem'n met H2O een goeie beurte mak'n. De previncie hef veur Hattem, Heerde en Epe een 'scharnierfunctie' in gedach'n. Zwolle en Apeldoorne gaot steeds meer saamp wark'n en daor ligge wie op de Oost-Veluwe mooi tuss'n in. Misschien dat oonze raodslied'n is met Bertus Dokter van de skeelerclub in gesprek mutt'n hoe hie 't eregeld hef datte zoveule geld kreeg van Jan. Ma dat wie richting de Eper mark mutt'n liek mien wel duudelik. Ik had dat ok graag edon met Gradus van Eek, wie stunn'n menare wel half. Ma helaas is Gradus niet meer en kunt wie 't doar niet meer aover hem.

Hendik uut de Veltsiet

reageer als eerste
Meer berichten

Shopbox