Logo veluws-nieuws.nl


Foto: Veluws Nieuws
Columns

Geld

Geld mak niet gelukkig is een uutdrukking die aai nog wel is heurt. Ma 't is wel handig aai dur wat van hebt, zee mien opoe dur dan metiene achter an. Dur is een tied ewès dat astur gin geld was, dan was ruil'n de menier um an die dinge te komm'n die een ander wel had ma ieje niet. Aai een wild vark'n escheut'n hadd'n, kon dat vleis ruil'n teg'n rogge waor een ander weer genog van had. Met geld is een hoop gemieter begunn'n.umdat 't nooit goed verdeeld is. In de middeleeuw'n was 't credo dat 't volk arm en dom mos bliev'm. Veur dat eerste zurg'n de adel en veur 't tweede meneer pastoor. Zelf geld hem en uut 't grote Boek leez'n, was tur niet bie.

Noe lêêve wie in een sam'nleaving die beheerst wordt deur de neo-liberale beginsel'n en bent wie van de rêêg'n in de drup ekomm'n. 'Tweedeling in de samenleving' is noe waor aai veule aover heurt. Hoogopgeleiden teg'n laagopgeleiden zogezeg. Met as toppunt hoe 't tur onder Trump in Amerika toe geit. Ook in oons land heb wie daor zo wat veurbeeld'n van. Een dividendbelasting van 1,4 miljard ofschaff'n zodat aandeelholders nog meer krieg en gemeent'n die met de breuk uut zitt'n as 't giet um de WMO en de jeugdzorg. En veural as warkgever niet teveule mens'n in diens nemm'n ma 't an loat'n komm'n op uutzendkrach'n en oaverwark. En slimme constructies bedenk'n um te zurg'n dat 't kapitaal veural gin risico's lup. Mens'n met een beperking maag dan wel wark'n ma 't risico muj of wentel'n op de samenleving. En as Rijk muj niet te veule uutgeev'm an zorg, dat kieper ie ma aover de schutting bie de gemeent'n.

Heerde is zon gemeente waor ze daor noe de vrucht'n van pluk. Ma ok in Epe, Oldebroek en Rotterdam komp ze veule miljoen\n tekort. En dat wodt dan weer of wentelt op de eig'n inwoners. De nieje gemeenteraod en 't college maag preber'n um de boel weer glad te striek'n. Ooit was 't een gevleugd woord: 'de starkste scholders mutt'n de zwoarste last'n draag'n'. En de nieje chirstelijk/sociale coalitie in Heerde hef al een veurzet egeev'm in die richting. Een extra verhoging van de OZB is weer bespreekbaar aak 't goed lêêze. Daor zal wel weer heel wat aover eproat word'n muj ma rêêk'n. Want 't probleem van mens'n met geld is dat ze dat graag zo wilt holl'n en liever nog dat aster nog veule meer bie kump.

Ik heb altied eleert dat geld een middel is um wat te bereik'n. En dan is 't inderdaad handig aai dur ok wat van heb. Ma as 't iene deel van de samenleaving dur veur zurg dat 't andere deel dat niet krig, kuj ma weinig beginn'n. Dan bei trugge in de donkere middeleeuw'n. Daor bent wel is revoluties aover uut 't breuk'n. Wie weet is noe de tied wel riepe dat de boel weer umme giet. Dat 't dikke ik is wat meer op de achtergrond kump en de vroage wodt: Wat kan'k veur een ander betek'n?

De nieje road en 't nieje college in Heerde kan an de klus beginn'n. Met drie wetholders van buut'n, zonder Heerder DNA. Al wilt ze wel hun beste doen um midd'n in de sam'nleaving te ston en veule de stroate op te goan. An Heerde, Waop'nveld en Veess'n/Vorcht'n wodt in ieder geval een eig'n wetholder toe eweez'n. Misschien een idee dat die wetholders doar dan ok gaot won'n. Wel handig, kuj is een keer bie de wetholder op de koffie goan....

Hendik uut de Veldsiet

Reageer als eerste
Meer berichten

Shopbox