Logo veluws-nieuws.nl


Foto: Veluws Nieuws
Columns

#toesoeze...

Van mien moe kreeg ik vrogger nog wel is de opmarking 'toe soeze' te heur'n. Meestal aai iets edon hadd'n waorbie er sprake was van schade an oe goed, ofwel an de kler'n die an hadd'n. Een veurbeeld. As jongen van een joor of veertiene fiets'n ik elke schoeldag nao de ambachtsschoele an de Blaloweg in Zwolle. Aak vanuit Zwolle kwaame, mos ik de Groteweg aoverstek'n um een zandpad in te rien nao huus toe. Op een dag naam ik die boch met flinke snelheid, ik had haos. Met dat aak van het asfalt op 't zandpad kwaame, gunk 't mis. En goed ok. Mien veurwiel sleut vot, de linkerknie schoer'n aover de kei'n en 't zand en dat deut ok de binn'nkante van mien linkerhad. Daor lag Hendik. 't Deut alderbass'nd zeer. Toe aak aoverende kwaame, sprung'n de traon'n mien in de oog'n. Ik keeke nao mien linkerknie en schrokke mien na. Alle vel van de knie of, bloed'n as een gek. En dan de fietse: dur was zo hier en daor aorig varve of, 't spatbord van 't veurwiel zat dubbel. Zo goed en zo kwaod as 't wol, strompel'n ik op huus an. De eerst'n die aak teg'nkwaame was de buurvrouwe Hendikien die net veur oons won'n. Zie hal'n gelieke een natte doek en begon mien wat op te kalefater'n. Vervolg'ns kwamp mien moe dur bie lop'n. 't Eerste wat ze zee was: Toe soeze, koj niet uutkiek,n? Muj die broek noe is zien!

Eerlik gezeg had ik nog niet nao die broek ekeek'n. Ma 't was ok niet fraai meer wat tur um mien linker bien zat. Een flink gat op de plek waor de knie mos zitt'n, die broek was noa zien grootje. Tante Hendikien trök zich ondertussen niks van mien moe an. Die gunk gewoon deur met 't schoone mak'n en hal'n ok een glas ranja. Mien moe meld'n vervolgens ok nog dat aak een weeke eerder ok al met de bloese achter een takke war'n bliev'm hang'n. Die had ze ook al bie de lomp'n kunn'n doen. Tante Hendikien bleef onverstoorbaar, zie pakk'n de knie netties in, maken mien hand schoone met jodium en doar kwamp een pleister op.

Ik mosse an dit veurval denk'n toe aak van de wêêke weer is wat lez'n aover die dividendbelasting die Mark Rutte wil schrapp'n. Ik dache: Toe soeze, kuj noe niet zien wat dat in samenleaving lös mak? Al joor'n lank fietse wie in dit land met de liberal'n op. Rutte zit op 't zadel en an 't stuur en veur- en achterop zitt'n vogels van verschillend pluimage. Stur'n kunt die weinig, Rutte giet zien gank. En dat is veural oaveral in snien wat in zien oog'n geld kost. De hele publieke zaak mut daor onder lien. In 't onderwies, bie 't leger, in de zorg, de postbodes. As 't kan mut dat allemaole veur een hongerleuntien.

De economie gruuit as een gek ma 't geld dat verdient wodt, wodt absoluut niet eerlik verdeeld. Rutte verdeeld 't wel onder de arm'n ma dan onder de linker- en de rechter arm. Wie weinig te makk'n hef, wodt tur in ieder geval niet beter van. Met as toppunt wel de ofschaffing van de dividendbelasting. Gin wonder dat de publieke sector helemaole rebels wodt en zie saamp wilt gaon stak'n. In '68 met de student'nopstande'n en de eerste grote onderwiesstaking in 1980 heb toe zat te doede emak en grote gevolgen ehad. Misschien mutte wie noe ma is met modarne midd'n van oons laot'n heur'n. De hestek #metoo hef heel wat te doende emak. Misschien zol 't help'n as wie noe begint met een hestek #toesoeze.....

Hendik uut de Veldsiet

Joop de Haan
reageer als eerste
Meer berichten

Shopbox