Logo veluws-nieuws.nl


Henk Dijkslag word'n deur veurzitter Jan van Leeuwen in 't zunnegie ezet bie zien ofscheid als schriftbeheerder.
Henk Dijkslag word'n deur veurzitter Jan van Leeuwen in 't zunnegie ezet bie zien ofscheid als schriftbeheerder. (Foto: Dialectwwerkgroep Heerde)

Bij afscheid als schriftbeheerder - Henk Diekslag op 't peerd ebeurd

Heerde - Henk Diekslag (90) is veurige wêêke of etrêên as schriftbeheerder van de Dialectwârkgoep Heerde/Waop'nvelde. Sinds de oprichting daorvan zatte zon dàttig jaor in 't bestuur. En natuurlik word'n deur de veurzitter Henk van Leeuwen flink op 't peerd ebeurd en in de bluumegies ezet.

Veurzitter Jan van Leeuwen bedankn Henk veur zien grote inzet veur de Dialectwârkgroep. Die rich'n Henk zon dàttig joar geleen op. Hie wârk'n toe bij de gemeente Apeldoorne en daor kwamp hie Herman Bomhof teeg'n. Herman wàrk'n bie de krante en schreef heel graag in 't Oost-Veluws. "Henk", zee Hermen, "ie moss'n in Heerde een dialectwârkgroep oprich'n. Dat was niet an dovemansor'n ezeg. Henk gunk an de gank en had in de kotste keer'n een stel luu bie menare. Al gauw bleek dat Henk zien mânnechien stunt.

"Niet alleent wârk'n hie veur oonze dialectwârkgroep, hie kwam ok bie grotere organisaatsies as het Verbond van de Nedersaksische taal, bie 't Sont en bie de dilalectkring Salland en Oost-Veluwe. Doar isse noe ok erelid van", vertell'n veurzitter Jan Leeuwen. Henk is natuurlik een icoon in de gemeente Heerde. Altied isse bezig ewès veur de gemeenschap. Doar begunt hie as jonge van 18 joar al met deur de Arbieders Jeugd Centrale (AJC) op te rich'n. En Henk kwamp natuurlik uut een vuurrood nès as 't um zien politieke kleur gunk. De PvdA isse dan ok altied trouw ebleev'm. Henk kenn'n ok zien beparking'n. Hie kreeg is de kaans um wethoder te word'n. "Ma ie mutt'n ok weet'n waor aai de kapaciteit'n niet veur heb Hendik", vertell'n hie mien is. En Henk scheuf toe Aant Bouman noa veur'n as wethouder. En dat was een goeie zet want daor hatte daornao ok gin umme kiek'n meer noa. Aant zol een dikke dàttig jaor wetholder blievm! En: Henk leup rustig vöt uut een vergadering van de gemeenteraod as 't elf uur ewès was. Hie mos de vollnde mâân um zes uur weer an de bushalte ston!

Henk hef tur heel wat ofeschreevm en edon. Saamp met een hele club mak'n de Dialectwârkgroep 't Heerder Woord'nboek en later 't Nieje Heerder Woordenboek. Dat leste ook met een hoop prachtige gezegdes zoas 'Dur verzöp eerder een vis as dât een boer verhongert' en 'Domme gaanzen schreeuwt 't hâdste'. Saamp met Hârman Visser word'n de cursus 'Uulle, wuulle, zuulle' op ezet. Veule allochton'n als Ireen Bunnik en Inez Pijnenburg heb doar een hoop plezier an belêêf.

Nao de brand in zien huus de Wepedoarne aan de Veerstroate, leren Henk zelfs met de kompjuter umme goan. Uut de brand konne nog wat verhal'n en gedich'n redd'n. Roelof Koebrugge en Simon Verhoeven heb tur veur ezurg dat dat de mooie uutgave 'Verzameld wârk Henk Dijkslag' worden. Te koop bie de Wereldwinkel en Villa Jacoba.Henk Diekslag hef ok een opvolger: Fennie Boerdam en dat is de eerste vrouwe in 't bestuur!

Jan Nitrauw
Meer berichten

Shopbox