Foto: Veluws Nieuws
Columns

Vliegtuug'n en de Veldsiet

In een hol langs de Parkweg in Waop'nvelde won'n heel lange geleen Jan de Sloffe. Een kluizenaar zeg mà. Jan was inwoner ewès van Hattem onder de naame Jan Beekhof, an lager wal eràk en had an de Parkweg een plekkie evunn'n. Mien opoe wis daor nog wel aover te vertell'n. Hoe as Jan in zien hol zat en as een soort Waop'nvelds orakel zie lich aover de wereld leut schien'n, 't Liek tur op dat ien van zien veurspellings binn'nkort uut giet komm'n.

Jan verkondig'n al rond 1880 an iederiene dat asturs mesjienes deur de luch zoll'n vlieg'n waor mens'n in zoll'n zitt'n. En dat was varre veur dat de gebroeders Wright de eerste keer de luch in gung'n. Dat word'n toen wat lacherig an eheurd ma de uutsprak'n van Jan komp noe wel heel dich bie. Wie krieg dur noe ok met te mak'n dat vliegtuig'n aover de Veldsiet gaot vlieg'n.

Veurige wêêke is de gemeenteroad van Heerde helemaole bie eproat aover hoe 't noe zit met de vliegtuug'n die lege aover Hattem, Waop'nvelde en Heerde zölt scheer'n. Niet zo leege dat aai kunt zien wat de passagiers veur drankies drink ma wel zo leege dat aai dur goed las van heb. Jennegie volg dat allemaole en die is goed pissig. "Straks ligge wie te schudd'n in bedde Hendik", deut zie net as Jan de Sloffe al vaste een veurspelling. En ik vreeze dat die nog uut kump ok.

Dur is een hoop verzet teeg'n ekomm'n, bienao tienduuz'nd bezwaorschrift'n heb minister Cora van Nieuwnhuuz'n op heur bureau ekreeg'n. Daoronder ok van 'Red de Veluwe' en andere actiegroep'n die faliekant teeg'n dat leege vlieg'n bent. Daor zit ok Kees Baumann van de camping de Bank'nburg in. De gemeenteroad van Heerde stell'n wel een belangrieke vraoge: Giet al dat verzet ok help'n? Zal de minister luuster'n noa de burgers?

Zelf zit de gemeente Heerde ok met een paar van zökke vroagstukk'n. Zoas die van de Horsthoekerschoele bieveurbeeld of as 't giet um de bezuuneging'n. Kees Baumann en zie kornuit'n hadd'n dur nog weinig vertrouw'n in dat de minister luustert. Zie heb een bezwaorschrift van zo'n tweehonderd pagina's emak. De kern van 't verhaal is: de vliegtuig'n mutt'n en kunt hogerop ma dat hef eff'n tied neudig. En dus mut Lelystad nog een jaor of wat dichte bliev'm.

Ma ja, dur is ok zoiets as een economisch belang en daorveur hef de minister ok weer allerlie rapport'n. 't Is noe an de Tweede Kamer um een beslissing te nemm'n. Die begint zich ok al te reur'n. Eppo Bruins van de CU in de Tweede Kamer hef zelf al routes bedach. En as politici dat gaot doen dan muj uutkiek'n. Meestal is dan 't gevolg dat ze uuteindelik zèk: Wie heb alles prebeert, ma 't luk niet. En dan krig de minister heur zin.

Aak 't goed begriepe kunne wie oons op gaon mak'n veur 't voll'nde onderwarp: de verkenner van de provincie Gelderland kump noe toch disse kante op. Die mut uutzuuk'n of 't wat kan word'n met de samenwarking op de Noord-Veluwe. In 't verled'n sneuvel'n de samenwarking met Oldebroek en Hattem. 't Zal mien beniej'n of ze noe ok gaot vraog'n wat de wie as inwoners daor van vindt.

Hendik uut de Velsiet

Jan Nitrauw
Meer berichten