Foto: Veluws Nieuws
Columns

Grès of vark'nsruggn?

Ik zââge 't veurige wêêke veur mien oog'n gebeur'n: een vrachwaag'n drei'n vanuut de Vlijtweg linksof de Groteweg op. De man achter 't stuur drei'n al watte kon ma kwamp toch in de bårm met zien rechterveurwiel. Hie heult wel de kop tur bie en gunk niet as een gek van links naor rechs stur'n. Toe hie zien veurwiel op een oprit kon zett'n stur'n hier weer 't asfalt op. Wat tur aoverbleef was een keurig rech spoer deur de bårm waor Joostema wel weer een kuub of viere grond in kwiet kan.

En aai langs de Groteweg fietst dan kom ie nogal wat van zokke spoers teg'n. Zowel links as rechs bent vrachwaag'ns en auto's in de barm erak met alle grote gat'n van dien. Noe verdien'n de uutvoering van de herinrichting al niet de schoonheidspries ma de ofwarking is ok niet bès.. 't Mos veur de fekaansie nog zon bettien met stoom en kok'nd water uut evoert worden. 't Leevern een hoop geheibel op bie de ondernemers op 't Barghuuzerterrein. Henk Diekman van Tema kwamp de stoom ongeveer uut de or'n toe hie dur achter kwamp dat de uutvoegstrook eschrap was. Dat word'n deur de gemeente dan ok weer haastig trugge edreit'. Ambtelijke meul'ns dreit niet altied langzaam, veur Diekman wolln ze wel water hal'n!. Peter Kwakkel zat tur ma mee, hier kreeg al die ondernemers op kantoor. En noe 't nieje asfalt dur lig, is 't ok nog niet veur menare. Ik kan mien niet an de indruk onttrekk'n dat as hier niet goed oaver noa edach is. Zowel bie de Van de Zeelaan as bie de Vlijtweg ling'n noe plateau's in de weg. Vrachwag'ns heur ie nog al poess'n en bloaz'n um die obstakels te nemmen. Ma bie de Kloosterweg, de kruusing waor de meeste ongelukk'n gebeurt, kuj zo deur rien. Noe kump daor dan ok 't probleem van de barms weer bie. En dat veur een gemeente die, aai 't college zo heurt, elk dubbeltie umme mut drei'n.

O, dur is wel bezuunigd heur. Langs de hele Groteweg zuj gin börties vind'n ma 'Zachte berm' of zoiets um de chaffeurs te waarschuw'n. Zol toch ok kunn'n dat 't grès deur de stiene heer gruuj'n? Dat ziej op andere plekk'n in Waopnvelde zoas bie 't beeld van de pepiermaker ok wel! Hoe 't op elös mut word'n weet ik ok niet ma Hendik wil wel een suggestie doen. Heerde kan misschien bie Epe is informer'n of ze daor die vark'nsrugg'n nog heb lingn. Die laag'n tussen de riebane en 't fietspad veur dat de Eperweg op eknap is deur de provincie. As proef veur de toekomstige sam'nwarking zol 't beschikbaar stell'n van de vark'nsruggen an de bur'n misschien een mooi gebaar wëën!

Trouwn's, al 't wårk is ok nog niet klaor. Wat sommige fietsers nog mist is een aoversteek bie de Vlijtweg. Aai vanof Hattem komp kuj daor niet meer aover stëëk'n um bie Vrieze's Erfgoed te komm'n. En hier en daor staot nog wat achtergeblevm bord'n die oe duudelik maak dat aai op disse 60 kilometerweg ma 50 kilometer maag rien. 't Volt mien ok mee dat aak de sheriff van Waop'nveld nog niet hebbe heur'n piep'n. Bie 't wårk an de Groteweg bent de páolties uut de Zevenakkersweg ehaald en die bent tur nog niet in ezet. Ik holle mien hatte vaste as 't ooit nog zo varre kump dat ze de Groteweg tussen Waop'nvelde en Heerde an goat pakken. Want ok dat mut op den duur een 60-kilometerweg word'n. Aai daor zokke barms maak, heb in ieder geval de wilde vark'ns weer meer barms um op de kop te zett'n....

Hendik uut de Veldsiet

Jan Nitrauw
Meer berichten