Foto: Veluws Nieuws
Columns

Knorre, knorre, knorretje...

Dweil'n met de krane lös hef weinig zin. En wilde vàrk'ns schiet'n met 't ecoduct Tolhuus aover de A50 is volg'ns mien net zo'n zinloze bezigheid. Tut een joar of zes, zeuv'm geleen bleev'm de vàrk'ns gewoon an de andere kante van de snelweg. De wilde vàrk'ns die an disse kante van de snelweg zaat'n,in de boss'\n van Hattem en Heerde, konn'n ze redelijk in hand holl'n. Ma vark'ns bent slimme diers. Zie vertelt menare dat aster an de rand van de Veluwe meer te vrêêt'n is dan in de dreuge boss'n van de Veluwe. En oe hei al een paar joar 't gegooi in de glaz'n. Koppels vàrk'ns trek noe deur de boss'n nao zogezeg de vleespott'n van Wao'nvelde. De gresland'n en maisakkers heb zoveule voer dat 't leav'm veur een wild zwien ien groot fees is. Ie kunt oe jong'n 't hele jaor deur te vrêêt'n geev'm en zelf kriej de boek ok vol.

Hoe dat tur an toe giet in de nachtelijke ur'n, heur'n ik van de wêêke. Stel oe veur: ie zitt'n bie de bushalte bie de rotonde in Wao'nvelde. Zo noa een uur of twaalf as de mens'nweerld te ruste is egaon, komt tur eers twee verkenners de boss'n van Petrea uut stapp'n. Zie kiek um zich heer en as de kust veilig is, komt zon vieftien soortgenot'n de weg aover. As die goed en wel in 't Stationspark bent, komt tur ok nog is een stuk of twaalf via de Meul'nweg 't Stationspark inlop'n. Saamp zet ze de feesweie van Waop'nveld flink op de kop. En asse jeuk heb, stiet een grote eik'nboom um is làkker langs heer te schoer'n.

En nog een ander verhaal. Een echpaar boav'm an de Parkweg was eff'n op fekaansie ewes. Dur stiet een hekkie um de flinke tuin en nog nooit hadd'n ze las ehad van de vàrk'ns. Tut dit jaor. Toe ze trugge kwam'n, leup een stellegie in de tuin te banjer'n. Toe de mannelijke helfte van 't echtpaar de auto uut kwamp, gunk 't spul dur vandeur. Zat tur aant een gat in 't hekwark? Nee heur, zie sprung'n dur gewoon aover heer! Bernard van de Barg van de schoele de Spreng'n weet tur noe ok alles van. 't Gresveld op landboed Buit'nzorg zoas dat gebied zo mooi heet, is iene grote puinhoop. En um nog eff'n deur te goan: de leste vàrk'ns bent noe wel uut de mais ma dat gunk ok niet zonder slag of stoot. Toe de leste mais deur de hakselaar gunk, hadd'n ze op veurhand de jagers ma ewaarschuwt. Dur zat'n nog een stuk of vief vàrk'ns in dat perceel. En ja heur, die vleug'n dur op een gegeevm ognblik uut. Met gezwinde spoed leup'n de diers richting 't Apeldoorns kanaal. Daor sprung'n ze pardoes in en as deelnemers an een triathlon zwomm'n ze 't kanaal aover. Ien dier had pech: net op de Kanaaldiek kwamp hie in aanraking met een auto. 't Gewonde dier kwam weer in 't kanaal terechte en word'n dood escheut'n. Die heb ze wel uut 't water kunn'n krieg'n.

Oons gemeentebestuur stelt noe veur um um 't Stationspark ma een hekke te zettn. Ma ja, zie wet'n de weg ok al nao de bur'n. Bie de bewoners van Rehoboth loop ze al onder 't slaopkamerraam van Frits Jongerman. Die meen'n dat asse een nachmerrie uut zien kindertied had. 'Knorre, knorre, knorretje' heffe vrogger tut vervelens toe op mutt'n zeng'n en noe heur'n dat weer! Umsgeliek deut Frits, net as vrogger, ok 't vervolg van dat vassie: 'de meester heeft een snorretje, de meester heeft een sik en af ben ik!'. En toe word'n hie wakker......

Jan Nitrauw
Meer berichten