Foto: Veluws Nieuws
Columns

En noe de inwoners...

De gemeenteraod van Heerde hèf de leste raodsvergadering goeie berich'n eheurd. As 't een bettien mee zit holt ze dit jaor geld aover, zie heb een goeie resarve en de piene bie de Plus OV is ok zon bettien eleen as een bettien mee zit. De brandweer is finansjeel ok wel uut de zurg'n. Alleent is 't nog niet zeker of oonze duukers en de brandweerauto die ze neudig heb wel beholl'n blif. Ma daor giet burgemeister Koops as een terrier veur ling'n. De duukers bent nog ma zo niet koppie onder aai begriep wat aak bedoele.

Noe wil 't geval dat aak op dit moment 't nieje boek van Geert Mak an 't leez'n benne. Geert deut daorin uut de doeken hoe 't gaon is in Griek'nland. Ie wet'n wel, die heb alderbassend veule mutt'n bezuunig'n um niet uut de IMF en de EU eknikkerd te word'n. Jawel, zie mogg'n wel oonze problem'n met de vluchteling'n oplossen. Althans, die mens'n blief daor vaste zitt'n en wie stuurt noe van die grote opleggers van Holtman uut Heerde die kante op met spul wat wie niet meer neudig bent ma dat ze daor goed kunt gebruuk'n. Geert Mak deut uut de doek'n Griek'nland op een gegev'm og'nblik weer voldeut an de finansjele veurwaard'n van de bobo's. Ma, zeg Geert Mak, gin mense vreug zich of hoe 't eig'nlik met de Griek'n gunk. En daor sleut hie de spieker op de kop. Boekholdkundig klopp'n 't allemaole ma de deursnee Griek had gien nagel meer um zien gat te krabb'n.

Daor zet Geert Mak Portugal teg'naover. Die trekk'n zich op een gegev'm niks meer an van al die grote bobo's die in die vervuil'nde vliegtuig'n van de iene top nao de andere vlieg. Portugal gunk zien eig'n gank en wonder baov'm wonder war'n die dur zo weer baov'm op. 't Verschil mut ween dat de Portugez'n zelf de hande uut de mouw'n esteuk'n heb. Vrogger blikk'n ze vis in en gunk de winst nao de handel, noe serveert ze zelf de vis an de toerist'n en steek ze zelf de winst in de zak.

Dat gevuul bekreup mien ok bie de leste roadsvergadering. 't Liek finansjeel allemoale weer in orde. 't Was joor'n ploeter'n nao dat 't Rijk een hoop wark aover de schutting gooi'n bie de gemeent'n. Dit volg'ns de regels van de liberale heilsstaat over de marktwarking. Ma de vraoge die aover blif is: Hoe giet 't met de inwoners van Heerde? Ik zaage in 't aoverzich van de stand van zak'n veur de bezuuniging'n nog wel een aantal maotregels die de inwoners zeer goat doen. In plaatse van 2,5 uur krieg mens'n die dat neudig heb straks nog een vergoeding veur 2 uur huusholdelijke hulpe. En Tafeltje Dek Je krig nog de helfte an subsidie. En op Cultuur mut tur ok nog halve ton of.

Boekholdkundig klop 't allemaole. Ma hoe giet 't met de inwoners? De raod wil de termometer gebruuk'n um de finansjele koortsen te met'n. Ma wie stek tur een termometer in 't welbevind'n van oonze inwoners? Wie doet wel wat. Via Leergeld kuj, aai an de regels voldoet, 75 euro krieg'n veur klerage en schoen'n. En de kost'n veur de invalid'nparkeerkaarte gaot nao bened'n. Ma iene zwaluw mak nog gin zommer en de marktwarking is daor mee niet aover boord. 't Liek wat op pleisters plakk'n. 't Zal mien beniej'n of de raod nog vadder deur giet pakk'n!

Hendik uut de Veldsiet

Jan Nitrauw
Meer berichten

Het lokale nieuws in uw mailbox ontvangen?

Aanmelden