Logo veluws-nieuws.nl
Columns

Column: Een glaassien zuut

  Column
column
column

Dur is iene Niejoarsdag die mien altied bie ebleev'm is. Welk joor weet ik niet meer ma 't was alderbass'nd kolt en een sneesturm met een snied'nde oost'nwind. Zon wind die oe de rollade nog an dunne plakkies mak. Mien va was in die tied hulpe bie Bos, ien van de kool'nboers in Waop'nvelde. Op Oldejoorsaomp mosse nog op pad um kool'n weg te brengen. Protester'n kwamp in và niet op, dur mos bezurg word'n. In de Lagestraote kwamp 't vrachwag'ntien van Bos vaste te zitt'n bie de Gerry Hoeve. Daor was de sneeuw zo hooge op eweid dat ze zich vaste red'n. Ma op Niejoorsdag gunge wie dur toch op uut. Een rundtien langs de femilie um Niejoor te schiet'n.

Ok nao ome Jaap Bredewolt ok wel Jaap Rechop enuump. Die zat altied steil rechtop. Op de fietse en op de bok van de slepkaore waor die met gunk asse zien vier keugies mos melk'n achter in 't Waop'nvelder Broek. Ome Jaap won'n net noas de iesbane bie 't Kloosterbos. Wat zêêk, een iesbane, nee een iesvlakte. 't Was een gigantische vlakte op de plek waor noe de voetbalveld'n van WZC ling'n. En op die Niejoarsdag gung'n de schaats'n ok mee. Want và kon wel proat'n bie ome Jaap, wie gung'n schaats'n! Want um bie ome Jaap wat te drink'n of zon vette eulibolle weg te kauw'n, was ok niet alles. Ome Jaap was vriejgezel en arg schone was 't tur niet. As ome Jaap koffie in deut, vêêg'n hie eers met de punte van de kiele deur een koffiekoppie um de moez'nköttels en andere narigheid dur uut te vêêg'n! Wie wuss'n dus dat aai wat later binn'n moss'n komm'n als de borrel op toafel kwamp. Want dan was tur veur de kinder een glaassien zuut. Die glaassies stunn'n in de kaste en war'n aorig schone. En noa een uurtie schaats'n gung ik dus toch op 't glaassien zuut an. Ik was toe ok bot kold! Foi, wat een smerige wind aover de iesbane! Op de dêêle deuj de schoene uut en deur 't heuimot sloff'n ie zo de keuk'n in.De buiskachel gaf mien een hitte! Heel benauwd.

Op de toafel de glaassies en de flesse zuut. Mien và had een dikke sigare an esteuk'n, een Hofnar, en damp'n flink vandan. 't Was ma zo zon keuterboertie met een stuk of vier melkkeugies, een paar vark'ns en een hok met kippen. Ma een leav'nswiesheid, heel biezunder. Hie mak'n hum nooit aant druk aover, was altied de rust zelve. Zien grote hande laag'n veur hum op toafel, de Biebel binn'n handbereik. Dat was ok zien geheim. Dat olde Woord was veur hem elke dag niej. Dat zat in de femilie. Ome Jaap zien zuster Hendikien won'n bie oons naos. Ik had heur de name 'Tana' egeev'm umdat ik as klein jonk tante Hendikien dur ma muuilik uut kreege. Tana was in geestelijk opzicht net heur breur. Tevreed'n met 't leav'm van elke dag en vol vertrouw'n op heur Heiland. "Hie zal 't wel met mien mak'n', was heur rotsvaste vertrouw'n. Noe de weerld zo in de brand stiet, kuj daor jaloers op wêên: Hij zal 't wel met mij maken. Wat 2017 dan ok giet breng'n zal niet veule anders wêên dan wat in 2016 is gebeurd en in 1960 of in 1920. Veule um oe druk um te mak'n, misschien veule veurspoed of een bonke narigheid. Jan Terlouw miss'n 't touwgie uut de briev'mbusse zo vertell'n de lessens op de tillevisie. En die opmarking mak'n heel wat lös. Ma misschien misse wie wel veule meer. En toch: veul heil en zeeg'n in 't nieje joor gewenst vanuut de Veldsiet.

Hendik uut de Veldsiet

Meer berichten

Shopbox